"Vulesse sentì 'o suon' 'e na campana
ca stesse appesa ncielo
e ca sunasse appiesa
senza nu sacrestano
ca tirasse
e mullasse
na funa longa 'a sott' 'o campanile
cumme si fosse Dio c' 'a fa' suna'.
Vulesse sentì 'o suon' 'e sta campana
grossa e pesante,
'e bbronzo,
e ca sunasse appiesa,
mmiez' 'e nnuvole,
ognettanto na vota,
no tutt'e matine
o quann'è ffesta
o quanno ll'omo mòre
ma sulo quanno 'a vita
e tutt' 'e ccose storte 'e chistu munno
t'hanno fatto perde 'a fede"